भेटीचे प्रेमांतर................!!!

प्रेमात पहिल्यांदाच पडल्यावर प्रत्येकाला त्याची प्रेयसी निदान ऐश्वर्या राय पेक्षा तरी किंचित जास्तच सुंदर वाटते.तिला इम्प्रेस करण्यासाठी त्याची वाटेल ते करण्याची तयारी असते.मग तो कधी तिची तुलना आकाशातील तारकांशी करतो तर कधी उगवत्या गुलाबाशी.तिलासुद्धा आपल्याला ह्याच्यासारखा जोडीदार लाभला याचा मनोनीत आनंद होऊ लागतो. आमच्या नायकाचे सुद्धा असेच झाले राव.........

साधारण काही दिवस प्रेमाचे लव्हाळे असेच चालू असतात.म्हणतात ना नव्याची नवलाई चार दिवस.तेच होतं.मग त्याला तिला रोज-रोज भेटणं आवडत नाही.तिच्या ड्रेस घालण्यावर तो उगाच काहीतरी कॉमेंट्स देतो.आजकाल हा आपल्याला भेटायचे टाळतो आहे हे तिच्याही लक्षात येतं.तू आता पहिलेसारखा नाही राहिलास मुळी.तिचा नाराजीचा सूर उगवतो.दोघंही नाराज होऊन निघून जातात............

पण म्हणतात ना खऱ्या प्रेमाची अनुभूती ही दूर राहिल्यानंतरच होते.मग बऱ्याच दिवसांनी भेटण्याचे ठरते.ती भेट पहिल्या भेटीहूनही अधिक रोमांचक वाटत असते.मग पुनः नव्याने भेटणे,नाराजी दूर करून राजी होणे हे फेरबदल मुख्य रूपाने होतात.आणि त्या भेटीचे रुपांतर पुनः प्रेमात होऊन जाते.

त्या भेटीच्या प्रेमांतराचा संवाद जणू कवितेच्या स्वरुपातच होतो...........

छान एका बागेत भेटण्याचे ठरले.

मी उशीरा आल्याने तिने दुरूनच पाहता

नाक मुरडले.

जीन्स,टी-शर्ट नेहमी घालणारी ती

आज चक्क सलवार घालून आली होती

बघून तिला मनात माझ्या प्रेमाची बासरी वाजत होती

अरे वा! तुमचे वाहन आज वेळेवर आले

तू कुठे गेला होतास?रागातच तिने विचारले

आल्या आल्या प्रश्न काय विचारते तूर्तास

कुठे काय? तुलाच आलो भेटण्यास

चल बसुया आत

भलताच दिसतोय आज वेगात

तिने मुद्दाम तिची ओढणी माझ्या

डोळ्यावर भिरकावत विचारले......

तुला दिसत नाही आज काही वेगळेपण?

हो जरा जास्तच रमणीय आहे वातावरण

असा कसा रे तू अनरोमांटिक

अगं बाजूच्या बाकावर बसलेली मुलगी आहे फंटास्टिक

रागाने उठून गेली ती तरातरा

मीही तिच्या मागे गेलो भराभरा

हातात घेउनी तिचा हात

म्हणालो खूप सुंदर दिसतेय तू आज

कसला चढलाय तुझ्या रुपाला साज

बदललेला दिसतोय तुझा मिजाझ......

आवडते मला तुझे रागावणे

काहीतरी नवीन सांग हे तर रोजचेच रडगाणे

नवं काही करायला गेलं तर तुझे नेहमीचेच बहाणे

देशील का मला माझे हवे ते मागणे

काय हवं आहे तुम्हाला मि.शहाणे

मला हवे आहे तुझ्या ओठांचे तराणे

गायचेय आज तुझ्या हृदयातील गाणे

हवा आहे तुझा मखमली स्पर्श

वातावरणात बहरू दे अपुल्या भेटीचा हर्ष

लाजलाजूनी चूर होऊन ती दूर पळाली

तिच्या लाजण्याने मला नवी चाहूल मिळाली

चटकन तिच्या गालावर लाजेची खळी खुलली

रुसलेली माझी सखी प्रीतीच्या गुलाबाने पुन्हा फुलली.